Молитва о прекращении войн и о мире всего мира

Владыко Вседержителю, Святый Царь! Призри с небесе и виждь, како враждуют народы и замышляют друг на друга суетное и злобное, како содрогается весь мир от воспоминания о бывших ужасах военных и трепещут от ожидания уготовляемых новых, еще более страшных. О, Многомилостиве, умилосердись о созданиях Твоих. Прости грехи и беззакония наши, их же ради многие скорби, беды и устрашения приидоша на нас. Благодатию Пресвятаго Духа ороси иссохшия любовию сердца людские, тернием самолюбия, ненависти и зависти, злобы, вражды и лукавства и иных беззаконий поросшие, да возрастят они горячую к Тебе и к братии любовь, и ею да будут истреблены все распри, раздоры, разделения, междоусобия и войны, да все народы не устами одними глаголют о мире, но всем сердцем возлюбивше его, непритворно раскуют мечи свои и копья на орудия мирнаго делания и к мирному токмо труду обратятся. Человеколюбивый и Милостивый! Усердно молим Тя: мир мирови Твоему даруй, Церквам Твоим, людям православным и всем творениям Твоим. Ты бо еси Царь мира, и мира Твоего несть предела, и Тебе слава, и благодарение, и поклонение от всех да воссылается и ныне, и присно, и до скончания века веков. Аминь.